作曲：民间
作词：迈仓·旦克
演唱：康珠吉
～
སྟག་ཤར་དགྲ་ལྷ་རྒྱས་རྒྱུ་བོ།།
སྨན་ཆུང་ང་ཡི་གཞས་ལ་གསོན།།
རྨ་ཆེན་གངས་ཀྱི་རི་རྒྱུད་འདི།།
རྨ་ཡུལ་བུ་མོའི་ངང་རྒྱུད་ཡིན།།
གངས་ལ་ཉི་འོད་ཕོག་པ་འདི།།
གཤིས་ལ་བྱམས་བརྩེ་ལྡན་རྟགས་ཡིན།།
ལུས་ལ་གར་སྟབས་འཛོམས་པ་འདི།།
སེང་ལྕམ་འབྲུག་མོའི་མཛངས་གཤིས་ཡིན།།
ལུས་ལ་གར་སྟབས་འཛོམས་པ་འདི།།
སེང་ལྕམ་འབྲུག་མོའི་མཛངས་གཤིས་ཡིན།།
～
སྟག་ཤར་ཁ་ལས་དགེ་རྒྱུ་བོ།།
སྨན་ཆུང་ང་ཡི་གཞས་ལ་གསོན།།
རྨ་ཀླུང་གཙང་བོའི་བཞུར་རྒྱུན་འདི།།
རྨ་ཡུལ་བུ་མོའི་ཕྱི་ཐག་ཡིན།།
ཆུ་ལ་དྭངས་ཤ་ལྷོད་པ་འདི།།
གཤིས་ལ་གུས་ལུགས་ལྡན་རྟགས་ཡིན།།
ངག་ལ་མགུར་མ་འཁྱིལ་བ་འདི།།
སེང་ལྕམ་འབྲུག་མོའི་དྲུག་འགྱུར་ཡིན།།
ངག་ལ་མགུར་མ་འཁྱིལ་བ་འདི།།
སེང་ལྕམ་འབྲུག་མོའི་དྲུག་འགྱུར་ཡིན།།
～〔＊RAP＊〕～
སྟག་ཤར་རླུང་རྟ་དར་རྒྱུ་བོ།།
སྨན་ཆུང་ང་ཡི་གཞས་ལ་གསོན།།
རྨ་གཞུང་རྩྭ་ཐང་ཡངས་པོ་འདི།།
རྨ་ཡུལ་བུ་མོའི་བློ་ཁོག་ཡིན།།
སྤང་ལ་མུ་མཐའ་བྲལ་བ་འདི།།
ཐུགས་ལ་ཡོན་ཏན་ཤོང་རྟགས་ཡིན།།
གདོང་ལ་འཛུམ་རྒྱ་གྲོལ་བ་འདི།།
སེང་ལྕམ་འབྲུག་མོའི་བཞད་སྒྲ་ཡིན།།
གདོང་ལ་འཛུམ་རྒྱ་གྲོལ་བ་འདི།།
སེང་ལྕམ་འབྲུག་མོའི་བཞད་སྒྲ་ཡིན།།
～